நினைவுக் கிடங்கு

தாய் தன் வீட்டிலிருந்து

கொணர்ந்த சந்தனக் கும்பா,

அப்பாவின் பார்க்கர் 

பேனா, 

சம்படம், கரண்டி, 

ரப்பர் பந்து,

பீங்கான் தட்டு,

இன்னும் .....இன்னும்

வந்து விழுந்தன 

கிணற்றுக்கு வெளியே.

நான் எறிந்த பொம்மை 

எடுக்க இதே கிணற்றில் 

குதித்த தங்கையின்

நினைவுகளை மட்டும்

தூர் வார முடியவில்லை.

பெற்றதும் விற்றதும்

படிப்புக்காக பத்து பவுனும்,

பதவிக்காக ரொக்கம் அம்பதாயிரமும்,

தாலி கட்டும் முன் முரண்டு 

பிடித்து வாங்கிய கழுத்து சங்கிலியும்,

தலை தீபாவளியன்று ஸ்கூட்டர் இல்லையேல் 

தலையில் வைத்த எண்ணையோடு 

கெளம்பி விடுவேன் என்று மிரட்டி

மாமனாரிடம் வாங்கியது, 

என சாதனைகளை

அடுக்கும் ஆம்பிளைக்கு

பொண்டாட்டி மனதில்

குன்டூசியளவு ஒரு இடம் 

கூட கிடைக்காதது

தெரியவே இல்லை.

வெறுமை

பீர் பாட்டில், 

சிகரெட் துண்டுகள்,

கிழித்து போடப்பட்ட

'பலான' பத்திரிக்கைகள் 

மிஞ்சிய மிக்சர் 

இவற்றோடு மனைவி

தாய் வீட்டுக்கு செல்லுகையில்

விட்டுச் சென்ற 

வெறுமையும் 

சேர்ந்து போனது 

குப்பைத் தொட்டிக்குள்.